依家環境咁差，唔容易搵份啱心水嘅工，仲要人工時間都就到你，真係難過登天，除非係佢咁寸！摩連奴兼職教葡萄牙？有得諗喎！
葡萄牙世盃8強出局，畀摩洛哥淘汰，嘥咗咁多好球員，領隊費蘭度山度士成為首席戰犯，大有機會被提前解約。
意大利《米蘭體育報》報道，葡萄牙足總已開始同摩連奴接觸，想佢接手國家隊。但寸王同羅馬仲有合約在身，唔係話走就走，消息指葡萄牙足總甚至可以接受摩佬做兼職，同時執教兩支球隊。
摩佬職業生涯，未教過國家隊，佢曾經講過，希望日後有機會為祖國効力，執教葡葡牙。兼教國家隊及球會，的確罕見，奇雲基謹曾經試過，1999年2月，當時教緊富咸嘅基瑾，被英格蘭足總臨時拉伕，兼教埋國家隊，代替因發言不當而要落台嘅荷杜。基瑾當季季中亦離開富咸，專心教國家隊。
費蘭度山度士2014年起出任國家隊領隊，2016年帶領葡萄牙奪歐洲國家盃，成就事業巔峰，亦贏得歐洲國家聯賽首屆冠軍。
但以葡萄牙鼎盛人腳，今屆世盃表現，只屬平平無奇，8強慘遭摩洛哥淘汰，68歲嘅山度士，無論如何都要負起一定責任。16強對瑞士，山度士大膽收起C朗，造就年輕前鋒干卡路連中三元；8強對摩洛哥故技重施，結果失敗收場，下半場中段先至換入C朗，亦未能挽回敗局。
