仲記唔記得邊個基恩？12年前，南非世界盃8強，蘇亞雷斯用手擋出加納嘅必入球，阿蘇被罰紅牌兼輸12碼，點知基恩主射狂抽中楣，之後烏拉圭更喺互射12碼階段勝出，畀阿蘇「賭命」成功……只差一點點，加納就可以創造非洲球隊嘅新紀錄。
12年間，蘇亞雷斯經歷過高山低谷，目前已經35歲嘅前巴塞神鋒，返咗祖家喪谷狀態，準備迎接最後一屆世界盃。至於已屆36嘅老牌加納前鋒基恩，雖然舊年4月至今已冇比賽，但亦揚言會盡最後努力，谷狀態參戰世界盃，為嘅，就係要報12年前之仇。
加納曾出戰2006、2010同2014世界盃，基恩3屆都有份參加，而且加埋入6球，係加納國家隊嘅Icon之一，亦係曾經嘅隊長。
不過，基恩自舊年4月之後就已經冇再踢波，最後一次係為祖家球隊歷安城出戰。好多人都以為佢已經無聲無息咁收咗山，但原來唔係，呢位踢過烏甸尼斯、新特蘭嘅前鋒話，為咗向烏拉圭復仇，正密鑼緊鼓準備出山。
「我知道分組賽對烏拉圭之後，已經不斷加操。我覺得今次係最好時機，加納人想復仇，呢場波，肯定係我哋世界盃史上最重要一戰！」
「我知有人質疑我（年紀大、冇班落），但我覺得最重要嘅係天份，我會操弗自己、儲好體能，8星期內，我就可以回復之前嘅水準。世界盃係球員嘅夢想，我仲可以繼續搏命。」一般預計，呢段時間基恩都會搵班落，進行實戰。
加納今屆世界盃抽中入H組，同組對手為葡萄牙、南韓及烏拉圭。
