卡尼開齋，英格蘭越踢越好！世界盃16強嚟到第四場賽事，依然係熱門天下，英格蘭以3:0怒炒塞內加爾，哈利卡尼終於開齋，不過今場最搶鏡嘅係祖迪比寧咸，搶斷、踢極唔跌成為佢嘅招牌動作，強勢上位！
英格蘭今場排出433陣式，防線依然係碧福特把守最後一關，守將右至左係基爾獲加、史東斯、麥佳亞同梳爾，中場用神軒、迪勤懷斯同比寧咸，前面三叉戟係沙卡仔、菲爾科頓同哈利卡尼。
塞內加爾比賽初段其實不落下風，保拿爾迪亞爆贏麥佳亞，不過史東斯趕到化險為夷。
老實講，今場英格蘭喺後場都交失幾多波，尤其麥佳亞都幾多斷纜，保拿爾迪亞入楔射唔到，伊斯美拿沙亞趕到近門起腳，史東斯閂到省中手，雖然塞內加爾投訴，但VAR認為冇問題。之後沙卡又喺後場輸孤寒波，伊斯美拿沙亞拎到，再交畀迪亞起腳，好彩碧福特反應快擋到。
英格蘭上半場中龍埋門欠奉，但一次就搞掂你，38分鐘，比寧咸喺左路狂奔再用地波傳中，佐敦軒達臣門前撞射搞掂，1比0。
完半場前，又係比寧咸，佢截到波後發動反擊，期間敵衛又拉又踢，但都踢唔低比寧咸，呢位19歲小將再將個波交畀科頓，科頓再彈比卡尼，由英格蘭隊長狂抽，2比0，卡尼亦成功開齋。
換邊後英格蘭越踢越好，去到57分鐘，科頓傳中，沙卡巧妙挑射破網，3比0。英格蘭出線只係時間問題，之後放慢節奏，陸續畀啲後備落場，基亞利殊、拉舒福特、艾歷迪亞、美臣蒙特等先後入替，畀班主力抖多啲，最終雙方亦再無任何交收，英格蘭出線8強，對手會係法國。
英格蘭今屆盡顯強大火力，6:2炒伊朗、3:0炒威爾斯、3:0炒塞內加爾，攻擊力暫時係今屆最強，相當厲害。
