絕地更要爭氣！日本、德國、西班牙同哥斯達黎加，為今屆世界盃寫上迄今最精彩傳奇嘅一夜，雖然最終結局係日本、西班牙首次名出線，但德國、哥斯達黎加嘅奮戰，亦都值得球迷們報以熱烈掌聲！
日本反勝西班牙，據opta數據，日本全場只有17.7%控球率，但憑住驚人鬥志，喺下半場3分鐘內完成驚天大逆轉，成為世界盃史上，控球率最低但又贏波嘅球隊。
西班牙領隊安歷基，賽後受訪都大讚日本隊：「日本嘅決心勁到難以置信，佢哋值得首名出線。」喺日本領先之後，哥斯達黎加曾經一度領先德國，令西班牙陷入出局邊緣，安歷基竟然咁答：「吓？係咩？我冇留意嗰邊賽果喎，係幾時嘅事？我唔知喎，如果我知，心臟病發都似。」
至於森保一喺世界盃前，其實一直備受質疑，用人、戰術同調動都被插到體無完膚，當開打後首戰反勝德國，即被捧上神檯，但對哥斯達黎加後，又跌番入地獄，甚至有激進球迷要求佢切腹。
如今再一次喺下半場換人後完成逆轉，兩大後備堂安律、三笘薰入波及助攻，森保一重上神檯，受訪時更有一吐烏氣嘅感覺：「呢場比賽，證明咗我哋要顯示嘅決心，由依家開始，大家會見到不一樣嘅日本隊，我哋嘅目標，殺入8強！」
