世界盃大熱門巴西，今晚就會喺8強火併克羅地亞。今屆已有3個士哥嘅李察利臣，早兩日喺安排下，接受一代森巴傳奇朗拿度訪問，李察利臣見到偶像已經感動到想喊，更估唔到嘅係，朗拿度對李察利臣充滿期望：「喺決賽剪我個髮型，將第6個世界盃冠軍，帶返巴西！」
早前巴西喺世界盃16強，以4:1大炒南韓後，斬獲士哥嘅9號仔李察利臣，獲安排同巴西02英雄朗拿度見面，李察利臣見到兒時偶像，又掩咀又怕醜，雙眼通紅，爭啲就開心到喊出嚟。
「好激動呀！我同尼馬一樣，你係我嘅偶像！係你啟發咗我！其實我剪過你2002年嗰個髮型，我諗你都應該睇過！」
兩代R9會面，朗拿度都對師弟充滿信心：「如果我當初激勵咗你，咁依家輪到你去鼓動番巴西嘅小朋友，我支持你哋，以你哋為榮……依家仲有3場比賽咋，去到決賽，你先再剪我（2002年）個髮型啦！」
巴西早幾日大炒南韓，李察利臣入波之後撩主帥迪堤一齊跳舞，迪堤又真係陪佢癲，引起軒然大波，巴西將帥被批評唔尊重對手，朗拿度都有提呢件事，佢話：「有呢種氣氛，唔會幫我哋贏波，但係有一個願意無條件付出、而且咁團結嘅球隊，對爭勝絕對有幫助。」
之後朗拿度仲話想學跳呢隻舞，李察利臣亦好樂意教佢。期間，朗拿度亦講出自己對師弟嘅寄望：「李察利臣，希望你繼續入波，將第六隻世界盃冠軍獎盃，帶返嚟巴西。」
