法國衛冕又多樣超強武器！據法國媒體《RMC》報導，早前宣稱因傷緣盡世界盃嘅前鋒賓施馬，基本上已經好番，大家嚟緊有冇機會見到呢位金球獎得主？
賓施馬自宣佈退隊後，行蹤一直成謎，《RMC》指，賓施馬已經返咗皇家馬德里，並極有機會喺呢一、兩日復操，而法國早已篤定獲得16強資格，首名出線的話，就會喺星期日晚對C組次名，亦即係話，賓施馬屆時已可候命。
事實上，迪甘斯亦似乎預視到呢件事，早喺賓施馬宣佈退隊嗰陣，迪甘斯就冇補選其他人、亦冇剔除佢個名，換言之，賓施馬只係26人大軍中嘅一員傷兵，完全合資格落場，若然法國奪冠的話，賓施馬亦會有冠軍獎牌。
馬會嘅足智彩神射手賠率，賓施馬亦一直冇除名，賠率為500倍，筆者想買番10蚊支持吓時，先發現淨係得賓施馬封咗盤、有得睇冇得買，有網民估計係馬會收到消息，會進行賠率調整，唔會再有500倍咁好分。
