日本連贏德國、西班牙兩大強國，奇跡晉身16強，加上伊朗、沙特都贏過波，依家壓力喺晒南韓身上，特別係亞洲天王孫興民。今晚對葡萄牙，壓力會轉化為動力？抑或會徹底壓垮太極虎？
日本、南韓始終係世仇，日本晉級之後，南韓球圈同球迷，話VAR偏幫日本，田中碧接應三笘薰傳中入波前，個波已經出晒底線。雖然有高角度畫面顯示，波皮同白界有重疊。VAR連同上場輸畀加納嘅執法球證，都瘋狂被插。
躁都冇用，睇番H組形勢，葡萄牙6分已晉級，加納3分，南韓、烏拉圭1分。南韓想出線，只有擊敗葡萄牙一條路，跟住最理想係烏拉圭和加納。情況係艱難，但今屆賽事，好多嘢都估佢唔到。
唔同日本收埋咁多強力武器，南韓主要攻擊力量始終係孫興民，又或依家可加埋曹圭成，但亞洲天王做完眼眶骨折手術，休息咗一排，狀態真係麻麻，莫講話攻門，連帶個波都唔多順暢，之前兩場分組賽，唔單止冇波入，甩波次數多達34次，竟然做咗南韓「進攻終結者」。
對加納賽後，孫仔傷心爆喊，並為自己差勁表現，向球迷道歉。趁葡萄牙篤定晉級，可能有所鬆懈時，孫興民有機會將功補過，起碼攞3分，其他嘢，就要等命運安排咯！
