巴塞隆拿、AC米蘭捧世界盃，原來唔係一件「衝出嚟＿」嘅事，成龍當年笑爆你同我嘅經典預測，2025年有機會成為現實！
今屆世界盃嚟到最後兩場波，季軍戰及決賽分別喺周六及周日晚開打，波未踢完，國際足協會長恩芬天奴（Gianni Infantino）已經急不及待搞記者會，講嘅都係世界盃，不過係球會版！佢話2025年會舉辦一個球會版世界盃，「巴塞捧世界盃」有機會成事！
「第一屆男子球會世界盃，將會喺2025年舉行，有32支球隊參賽，形式係盃賽咁，就好似世界盃一樣……我哋已經落實會搞，不過細節上仲要啲時間執執同討論。」
消息一出即時震驚Twitter，唔少球迷都諗緊呢個賽事，究竟會喺球季邊個時段舉行，外界一般相信，今次FIFA嘅目的，係要創造一個賽事去抗衡歐聯，唔畀UEFA獨大自肥。
咁當然，恩芬天奴亦有講吓今屆世界盃，冇咁勁吹到咁勁，指卡塔爾係「有史以來最好嘅世界盃」，特別提到係「最具歡樂氣氛」。對於來屆世界盃，恩芬天奴繼續吹爆佢：「我哋唔單止睇好足球發展，更相信呢項賽事會有巨大影響力。我哋相足球嘅力量，佢將成為北美第一運動。」
