'

【世盃快打】國腳生涯未完結!摩笛宣佈留隊 6月力爭史上首個大賽冠軍

克羅地亞喺季軍戰以2比1擊退摩洛哥,近兩屆世界盃分別獲亞軍、季軍,連同98年首次參賽即奪季,克羅地亞用穩定戰績說話,球隊唔再係咩奇蹟黑馬,而係實牙實齒嘅歐洲一線勁旅。

37歲不老中場摩迪,今屆已經係第4次出戰世界盃決賽周,06年、14年分組賽出局,18年亞軍、今年季軍,最重要係拎埋金球獎,總結呢4屆世盃,摩迪踢咗19戰,17場正選,14次做隊長,2入球、1助攻,個人收穫相當豐富。

踢完季軍戰後,如釋重負嘅摩迪笑到四萬咁口,攬爸爸、同個囡喺場內跳舞,仲將個銅牌送畀囡囡做禮物。「係,我哋好想拎冠軍,而且曾經好接近……雖然遺憾,但我哋應該自豪。克羅地亞唔係20年一次嘅奇蹟,而係大賽常客、足球強國。」

摩迪仲澄清唔會退休、亦唔會退役:「我會踢埋歐國聯決賽周,我哋已經入咗4強,歐國聯之後先再考慮。」歐國聯4強分別係克羅地亞、西班牙、意大利及荷蘭,賽事會喺23年6月舉行,克羅地亞絕對有機會取得國家史上首個大賽冠軍。