周一晚16強大戰，亞洲足球迎來歷史性時刻。日本先對上屆亞軍克羅地亞，南韓尾場挑戰5屆盟主巴西。究竟係攜手入8強？只能活一隊？雙雙出局？
上述三種可能性，孫興民、三笘薰各起關鍵影響。
孫興民第三度參戰決賽周，上兩次分組賽出局後，佢都喊到收唔到聲。擊敗葡萄牙入16強，更興奮到掟面罩，跟住跪地爆喊。
一個徹底解放。首兩仗表現差，被國內球迷大肆評擊，但補時階段藉自己一個靚傳，由黃喜燦射爆葡萄牙，總算恢復名譽。
孫興民：「我流嘅係幸福的眼淚，南韓為呢一刻等咗好耐，身為球員，我哋完全相信自己可以做得到……係，有時我冇辦法做到最好，我好感謝隊友，因為佢哋喺我未能善盡職責時掩護我，我為佢哋感到驕傲。」
「冇人能夠徹底了解足球世界，尤其係今次決賽周，我哋有機會擊敗巴西，南韓將歇盡全力，踢好呢場比賽。」
根據OPTA數據分析，南韓只有15.9%機會擊敗巴西，日本則有23.7%機會挫克羅地亞，足球小將真係可以實現決賽周前所訂目標，歷史性打入8強？
領隊森保一神鬼難分，究竟會點排陣？特別係前鋒線，會唔會再將最有威力嘅三笘薰先收起，留待下半場蓄鋭一擊？
三笘薰賽前保持平常心：「做唔做正選，對我嚟講完全唔係問題。我會聽從領隊指示，最重要日本隊能夠取得勝利。」
日韓為自己，為亞洲足球，共同爭取勝利，但兩國畢竟世仇，部份球員始終有敵對情緒。喺日本人氣爆升嘅南韓中鋒曹圭成，接受訪問時話，自己唔想講日本晉級問題，只會關心自己隊波。
只係如果，如果今晚奇跡再現，日韓同時爆冷晉級，就會8強相遇，果真如此，話題性及激烈程度，一定唔輸决賽！
