今屆世界盃，巴西成為大熱門，被睇好可以第6次奪冠。領隊迪堤今次選人，最特別係揀咗6位翼鋒，名副其實以翼制霸！
巴西出過好多經典攻擊組合，唔好講咁遠，近30年有白必圖+羅馬里奧，又有朗拿度、朗拿甸奴、李華度「3R」，帶來1994、2002兩次冠軍。但近兩屆真係差咗好多，只得尼馬夠卡士，古天奴、奧斯卡、費特（以前嗰位鬍鬚前鋒、唔係曼聯嗰個）都要做攻擊主力，當然同冠軍絕緣。
2022又如何？中前場組合，雙防中會係卡斯米路、法賓奴或古馬雷斯；尼馬墮後做攻擊中場，李察利臣或加比爾捷西斯任單箭頭；最大變化係雙翼，計埋尼馬在內，共選入6位咁多，擺明翼鋒就係迪堤戰術重心之所在。
除尼馬可以打左翼外，其他5人仲有加比爾馬天尼利、安東尼、拉芬夏、雲尼斯奧斯、洛迪高高斯。
右翼位置上，上季幾乎憑一己之力協助列斯聯護級，今季轉投巴塞隆拿嘅拉芬夏，盤扭、傳球能力俱佳，由邊線內切起腳射門，造成極大威脅（過去11次代表巴西射入5球）。拉芬夏應能壓過安東尼，搶得正選位置。而洛迪高高斯近兩季喺皇家馬德里，表現一直有進步，進攻效率非常唔錯，預計出場次序亦會喺安東尼之前。
睇埋左翼位置，雲尼斯奧斯祖利亞喺名帥安察洛堤調教下，上季表現更趨成熟，於西甲直接或間接為皇馬創造30個入球，歐聯決賽更射入致勝球，成為奪標頭號功臣。
預計速度極高、擅於殺入禁區為隊友鋪橋搭路嘅雲尼斯奧斯，正選席位相當穩固，今季喺阿仙奴迅速冒起、擅於入楔嘅馬天利尼，亦會係強力替補。
近年國際足協將每場比賽換人上限由3個增加至5個，巴西領隊迪堤將會延續南美洲區外圍賽嘅成功策略，每場比賽用盡換人名額，畀以上幾位個人能力極強嘅翼鋒輪流爆破對手，再加上尼馬、盧卡斯柏基達後上支援，足以令對手疲於奔命，增加巴西奪標本錢。
