腳患馬又受重創，今次重要係十字韌帶，肯定有排搞。講緊嘅馬係尼馬。巴西足總確認，呢位31歲國腳左膝十字韌帶撕裂，需要接受手術，一般相信佢需要以月計康復時間，復出無期。
巴西足總喺周三發表聲明：「巴西人同全世界球壇都希望尼馬快啲好番，因為有尼馬嘅足球，先會更特別、更令球迷更開心。」聲明中亦指出，尼馬經多次檢驗後確認左膝十字韌帶撕裂，未定開刀日期。
十字韌帶撕裂係球員最驚最驚嘅傷，除咗養傷時間超長，起碼一年半載之外
餘，好多人復出後，表現亦會大不如前。而巴西足總同尼馬所屬球會希拉爾，都評估過尼馬嘅康復時間，暫時都係至少以數月計，今季勢必報銷。
尼馬每季一傷，幾乎已成慣例，甚至有人話佢只係扮傷，只為返巴西同老友玩、又或者係幫細妹慶祝生日，但今次冇得扮，真係出晒事。最近6個球季，尼馬累計受傷16次，養傷時數為640日。
31歲嘅尼馬，日前喺世界盃外圍賽對烏拉圭，完半場前被迪拉告斯踢跌，倒地一刻表情勁痛苦，雙手掩面、眼泛淚光。軍醫入場將佢抬上擔架，雖然後尾尼馬落到地行，但都要醫護人員攙扶先可以返入更衣室。
隊友卡斯美路賽後受訪，講咗一個悲哀嘅事實：「傷病、傷病、傷病……當佢開始有動力去踢好波嗰陣，又出現傷病……佢呢幾年來一直受傷患困擾，每次都希望盡快復出，但係傷患反覆無常，佢一定感受到重大挫折。」
