【世盃外】由衝突演變成警察毆球迷 美斯勸交唔成幾乎罷踢!阿根廷贏1:0 巴西3連敗

周三早上世界盃南美洲區外圍賽,巴西主場0:1負阿根廷,唔止3連敗,仲要場面極度火爆!兩軍球迷開大片,警察介入後更變成加入戰團,美斯勸交都搞唔掂,場波幾乎要取消。

由球員出場喪噓到播國歌,雙方球迷爆發衝突,多人浴血,需由警方介入,賽事延遲半小時開賽。巴西連同今場在內,喺外圍賽連輸3場,當中包括主場賽事,更係有史以來首次。

巴西《環球體育報》記者話,里約熱內盧警方喺衝突發生後,隔咗好耐先至介入事件,而警方介入後,更與阿根廷球迷進行自由搏擊,多人被警棍打至頭破血流。巴西同阿根廷球員行去看台安撫球迷,阿根廷門將馬天尼斯,更企圖衝上看台阻止巴西警追打阿根廷球迷。美斯見勸交唔成,一度帶領球員返回更衣室。

擾亂一陣過後,巴西同阿根廷球員行番出球場,進行呢場宿敵大戰,全場雙方射門次數不多,阿根廷喺63分鐘,由奧達文迪接應角球頂入全場唯一入球,助阿根廷繼2021年美洲國家盃後,再次喺馬拉簡拿球場擊敗巴西。

今場火藥味爆燈,半場雙方共有22次犯規,破咗今屆外圍賽紀錄。紐卡素中場祖連頓下半場入替後,82分鐘推跌迪保羅被逐,全場共有42次犯規,球證出示咗3黃1紅,已經算少。

阿根廷全取3分,總算走出上場不敵烏拉圭陰霾,積15分重返榜首。反之,3連敗嘅巴西目前只有7分,跌至第6位,表現令人失望。同日其他賽果,烏拉圭憑達雲紐尼斯梅開二度,主場3:0炒玻利維亞,位列積分榜次席;哥倫比亞以1:0險勝巴拉圭排第3。前7名球隊可直接晉身2026世界盃決賽周。