世界盃32強B組賽事，香港時間星期二凌晨3時正，美國就對威爾斯。呢兩隊波拍埋一齊，就形成強烈對比。今屆美國班波年青當打，好多個都效力歐洲大球會搵食，而且睇到佢哋不斷進步，豐厚潛力惹人好感。相反，威爾斯暮氣沉沉，幾位所謂核心人物都漸漸褪色，同幾年前當打之時差好遠。
可能美國球員波底無啲歐洲隊咁好，但啲老seafood成日都話，唔好波唔緊要，一人走多兩步囉。而體力呢點正正係美國強項。美國26人名單當中，只得3個球員係30歲或以上，體力十足肯定係佢哋致勝本錢。
就好似24歲中場麥堅尼，自從佢去咗祖雲達斯後，死纏爛打式踢法可謂表露無遺，呢隻「體能獸」球場覆蓋面極廣，隨時燒乾威爾斯班老哥。當然，車仔24歲進攻球員基斯甸普列錫，華倫19歲中場尤尼斯穆沙，同屬美國打青春班嘅重心球員。
威爾斯無乜新血，依家仍然要靠加里夫巴利搵機會。佢最後幾年踢皇馬時已經無乜貨賣，本身又有傷患底，好難憧憬佢會再發光發亮。艾朗藍斯更加係「腳患馬」，有時連90分鐘氣量都無，點同美國班後生仔鬥chur。家陣美國齋W有2.28倍，確係唔錯嘅選擇。
