衛冕魔咒真係咁誇張？上屆世界盃盟主法國，賽前再一次遭受致命打擊，繼普巴、簡迪、甘佩比、尼干古後，應屆金球獎得主賓施馬，亦正式因傷宣佈退隊，再一次無緣參戰世界盃。
34歲嘅賓施馬，係2014世界盃法國首席射手，但之後因勒索隊友華布拿而被國家隊放棄，錯過咗捧2018世界盃嘅機會。浪子回頭嘅賓施馬，去到舊年終於用表現打動到迪甘斯，獲重召入伍，今年更攀上高峰，勇奪金球獎。
可惜世事就係咁巧合，賓施馬今季喺皇馬受傷患困擾，11月份更加係坐多過踢，以為抖足養好傷，可以喺世界盃大展身手，點知喺首課操練中，因為一次衝刺練習覺得劇痛，經檢查後證實肌肉撕裂，最少都要抖3星期，正式宣佈緣盡決賽周。
賓施馬事後喺ig出post，剖白感受：「我呢世人從來未試過放棄，不過我今次必須為國家隊着想，理智話畀我知，我要將個位讓畀其他人，一個可以幫法國踢好世界盃嘅人，多謝大家嘅關心同支持。」
今次係自1978年丹麥名將西蒙遜（Allan Simonsen）後，首次有應屆金球獎得主未能參戰世界盃。
法國今屆身處D組，第一場賽事係喺周三凌晨對澳洲，另外兩隊對手係丹麥同突尼西亞，而賓施馬嘅正箭頭位置，預計會用番上屆功臣基奧特，至於會唔會再補選，暫時未有消息。
