英格蘭公布世界盃26人大軍名單，李斯特城中場占士麥迪臣、紐卡素前鋒哥林威爾遜都有入選，爆出小冷門，兩人獲徵召，會唔會幫到英格蘭嘅鋒線？
修夫基揀人一向冇乜突破，尤其係攻擊組合欠變化，例如占士麥迪臣，雖然李斯特城成績差，但無損佢優秀嘅個人表現，仍然係目前英超其中一個最佳攻擊中場。一直以來，修夫基都被抨擊點解唔用占士麥迪臣，今次終於肯召佢入伍，都係好事。
紐卡素氣勢如虹，球員狀態好，哥林威爾遜近期不斷有波入，作為強力中鋒，做哈利卡尼後備都係極佳人選，現階段嘅效果，估計應該好過把握力極須改善嘅譚美阿巴謙。
今次取哥林、捨譚仔，算係少少冷門，但譚美阿巴謙今季喺羅馬表現真係麻麻，浪費唔少入波機會，向來坐穩嘅國家隊二號中鋒位置嘅佢，臨門一腳被踢走，其實亦冇得好怨。
至於麥佳亞問題，其實冇傷病的話，修夫基一定會揀佢。雖然被外界彈到體無完膚，但無論國家隊及曼聯、由領隊至隊友，一直都好撐麥麥送，或者真係有佢嘅個人魅力而我哋見唔到，令到人心悅誠服啩。
曼聯除麥麥送，仲有勞基梳爾、拉舒福特入選，查頓辛祖冇份係有少少爆冷，但考慮到佢近兩季喺曼聯表現，落選係相當合理。
修夫基長期打雙防守中場，其中一個鐵膽係加雲菲臘斯，季初因肩傷施手術，畀佢趕得切好番，可以再同老拍檔迪勤懷斯合作。
榜首阿仙奴咁弗，冇理由剩係得龍門蘭斯達爾入選，之前唔受重用嘅賓韋特，終於獲重召入伍。講防守水準，多功能賓韋特肯定高過麥麥送同艾歷迪亞，咁都冇份先至冇天理。
可以咁講，修夫基呢份名單，總體算係幾合理，佢哋分組賽喺B組，同組對手係伊朗、美國、威爾斯，只要發揮正常，首名基本上冇問題，出線16強後，對手係A組次名，應不離塞內加爾或厄瓜多爾，阻力亦不大，但去到8強打後已難預計，行到幾遠，就要睇修夫基嘅臨場調動能力喇。
英格蘭世盃26人名單
門將
比克福特（愛華頓）
尼克普比（紐卡素）
蘭斯達爾（阿仙奴）
後衞
勞基梳爾（曼聯）
麥佳亞（曼聯）
艾歷迪亞（熱刺）
捷比亞（紐卡素）
基爾獲加（曼城）
阿歷山大阿諾特（利物浦）
賓韋特（阿仙奴）
高亞迪（愛華頓）
史東斯（曼城）
中場
迪勤懷斯（韋斯咸）
干拿加歷查（車路士）
祖迪比寧咸（多蒙特）
佐敦軒達臣（利物浦）
美臣蒙特（車路士）
加雲菲臘斯（曼城）
占士麥迪臣（李斯特城）
前鋒
哈利卡尼（熱刺）
史達寧（車路士）
菲爾科頓（曼城）
基亞利殊（曼城）
布卡約沙卡（阿仙奴）
哥林威爾遜（紐卡素）
拉舒福特（曼聯）
