厄瓜多爾順利喺揭幕戰旗開得勝，以2:0輕取東道主卡塔爾。搶到寶貴3分，當然可喜可賀，當厄瓜多爾慶祝入波嗰陣，見到佢哋圍埋一齊、跪地指天，唔少人都以為係宗教儀式，冇特別留意，但其實背後有段故。
2013年7月，厄瓜多爾前鋒賓尼達斯（Christian Benítez）由墨超轉投卡塔爾聯賽球隊艾查殊（El Jaish SC），地標戰係7月28號超級盃對卡塔爾SC，但之後一日，亦即29號就離奇因心臟停頓而逝世，享年僅27歲。
賓尼達斯當時係厄瓜多爾首席射手，曾經效力過仲喺英超嘅伯明翰，由於佢踢墨超CF阿美利加大放光芒，深受美洲球迷喜愛，佢嘅驟然瘁逝，令唔少美洲球迷心碎，並向艾查殊會方追究，不過艾查殊之後公佈，賓尼達斯體檢嗰陣非常健康，病發原因不明。
賓尼達斯逝世後，比佢年輕3歲嘅安拿華倫西亞被委以重任，代替賓尼達斯嘅正箭頭位置，出戰2014世界盃，安拿華倫西亞喺該屆入兩球，表現不俗。
8年後，安拿尋晚入多兩球，與眾隊友圍圈跪地指天，將入球同勝仗獻予喺卡塔爾瘁逝嘅賓尼達斯。安拿目前已經為國家隊取得37球，成為該國史上首席射手，而賓尼達斯則永遠停留喺25球，排史上第4。
