世界盃周一凌晨零時開波，喺呢個時候，再有巨星因傷證實緣盡卡塔爾。非洲冠軍塞內加爾宣佈，王牌前鋒沙迪奧文尼已進行手術，肯定唔可以參戰決賽周。
文尼較早前喺德甲對雲達不來梅嗰陣受傷，雖然仍有入選26人大軍名單，希望佢可以喺分組賽較後時間復出，仲話搵埋巫醫幫手添！但塞內加爾國家隊抵達卡塔爾時，文尼未有隨隊，已知大事不妙。
拜仁發聲明，指文尼周四（17號）已進行跟腱手術，之後會展開復康治療。德國《圖片報》報導文尼需養傷3個月，會錯過埋歐聯16強。
冇咗超級王牌，對塞內加爾將構成致命打擊，只能靠屈福特前鋒伊斯美拿沙亞攻堅。塞內加爾被編入A組，對手有荷蘭、卡塔爾、塞內加爾，原本出線機會審慎樂觀，但突然失去絕對主力，勢將出現變數。
今屆32強球隊，不斷有主力國腳因傷未能入選，決賽周安排喺11月舉行，令各國本土比賽被逼加密賽程，係導致球員不斷受傷主因。部份剛傷好球員，即使趕及入選，如阿根廷前鋒戴巴拿，惟表現亦難有保證。
即使已去到卡塔爾集訓，仍陸續有球員因傷退出。繼法國前鋒尼根古於操練被卡馬雲加踩傷後，阿根廷嘅祖亞昆哥利亞、費倫天拿前鋒尼高拉斯干沙利斯均因傷退隊。阿根廷臨時補選兩人，包括馬體會後備安祖哥利亞、美職阿特蘭大聯嘅堤亞高艾美達，對阿根廷攻力，構成某程度打擊。
