'

【世盃錦囊】日韓鬥心全面爆發,遇強越強咪睇少

世界盃16強賽事都打咗四場,唔係話唔好睇,但硬係少咗啲激情震撼場面。不過今晚就可能有,事關亞洲雙雄將會齊齊出擊。星期一夜晚11點先有日本對克羅地亞,去到星期二凌晨3點就有巴西對南韓。日本以及南韓都受讓,揀晒下盤。

日本能於E組脫穎而出,以首名晉級16強認真唔簡單。話晒都砌低德國同西班牙,呢個賽績絕對亮麗。或者球員身體質素係差少少,但你咪理,日本就用鬥心搭夠。現時日本真係火噴噴,勒都勒唔住嗰隻,有能力畀到住克羅地亞壓力。

查實要激發日本隊鬥心,對手最好勁勁哋又有啲名氣,而克羅地亞就啱啱好。既係上屆世界盃亞軍,陣中亦有唔少球星。依家日本受讓平半高水,下盤係唔錯嘅選擇。

而巴西對南韓,個盤就開得好辣,巴西讓到球半/兩球。明白到雙方實力係有差距,但以南韓於分組賽嘅出色演出,巴西要贏或者大勝都唔容易。

實在南韓球員體能一環向來出色,若果全場逼搶的話,巴西都唔易組織到有效攻勢。加埋南韓球星孫興民狀態開始返嚟,對於球隊爭取好成績必有幫助。