【世界足球先生】美斯夏蘭特同分 阿根廷球王因一條件贏個馬鼻 網民質疑冇說服力

國際足協頒獎禮,星期一喺倫敦舉行,最注目嘅世界足球先生獎項,罕有出現同分情況,球王美斯與曼城殺神夏蘭特同得48分。最終美斯因為較多國家隊隊長首選票,破紀錄第3度獲得殊榮,而美斯未有出席,獎項由主持兼昔日巴塞隊友亨利代領。

不過,今屆獎項係計2022年12月19日至2023年8月20日之間嘅表現,亦即係美斯拎完世界盃之後,喺今次評選期間,美斯喺巴黎聖日耳門入咗10球,拎咗法甲冠軍,之後就去咗國際邁亞密,捧走北美聯賽盃冠軍。

至於夏蘭特,就喺呢段期間各項賽事攻入28球,成為多料金靴得主,助曼城歷史性成為3冠王。因此,有不少球評家同網民,都認為夏蘭特其實更值得當選。

國際足球先生投選機制,係分國家隊隊長、國家隊主帥、媒體同球迷投票4個組別,每組投票比重均佔25%。美斯同夏蘭特總分一樣係48分。

根據規例,同分就按較多隊長首選票為勝,美斯獲得107位國家隊隊長首選,而夏蘭特就得64人係首選,亦因此,阿根廷球王成功第3度當選,成為史上當選次數最多球員。巴黎聖日耳門嘅麥巴比排第3。

美斯獲得最多國家隊隊長首選票,已知投佢第一嘅分別有英格蘭哈利卡尼、法國麥巴比、荷蘭雲迪積克、埃及沙拿、克羅地亞莫迪歷、比利時盧卡古、蘇格蘭嘅羅拔臣。

至於美斯自己,就揀咗夏蘭特第一、然後係麥巴比、艾華利斯。我哋港隊代表葉鴻輝,就依次揀咗迪布尼、夏蘭特同美斯。教練莊恩安達臣,同樣係夏蘭特第一,第二及三分別係根度簡同麥總。另外,葡萄牙C朗繼續棄權,由比比代投,佢揀咗同鄉貝拿度施華做首選。