一個烏龍波，烏克蘭於歐洲區附加賽0:1負威爾斯，無緣世界盃決賽周。雖然遺憾，但絕對可以昂首挺胸離場。
淘汰蘇格蘭後，烏克蘭相隔4日繼續作客，依然以高昂戰意佔有優勢，全場共18次射門，9次中目標，但始終入唔到波，威爾斯龍門軒尼斯今場有神級演出，多次救出危險攻門。
全場唯一入球，出現喺34分鐘，加里夫巴利主射自由球，耶莫蘭高回防想頭槌解圍，反而改變方向擺烏龍，烏克蘭就以呢球飲恨。
加里夫巴利喺過去一季，僅7次為皇家馬德里上陣，除咗打高爾夫球，主力係踢世界盃。即使未至於憑佢一人之力，但威爾斯能繼1958年再次打入世盃決賽周，巴利無疑係最大功臣。
完場之後，當威爾斯球員熱烈慶祝時，加里夫巴利主動走向烏克蘭球員，逐個握手安慰，有風度識大體，值得一讚。
韋斯咸中場耶莫蘭高，作為老大哥，賽後帶領隊員走向烏克蘭球迷看台，感謝佢哋嘅支持，佢為烏龍波自責落淚，唔少隊友亦為輸波痛哭，場面感人。但無需憂懷喪志，戰鬥依然繼續，只要保持鬥志，總會有勝利一日。
分組形勢：
A組：卡塔爾、厄瓜多爾、塞內加爾、荷蘭
B組：英格蘭、伊朗、美國、威爾斯
C組：阿根廷、沙特阿拉伯、墨西哥、波蘭
D組：法國、秘魯Vs阿聯酋/澳洲、丹麥、突尼西亞
E組：西班牙、哥斯達黎加Vs新西蘭、德國、日本
F組：比利時、加拿大、摩洛哥、克羅地亞
G組：巴西、塞爾維亞、瑞士、喀麥隆
H組：葡萄牙、加納、烏拉圭、南韓
