100%勝率！皇家馬德里於世界冠軍球會盃決賽，5:3勇挫亞洲代表希拉爾，歷史性第5度封王。領隊安察洛堤近期有啲壓力，更有傳佢會執教巴西國家隊，不過肥安就斬釘截鐵咁話：「我同皇馬份約去到2024！」
世冠盃2000年開始舉辦，皇馬之前喺2014、16、17、18，4次成為冠軍，今年亦保持必勝傳統，進一步拋離宿敵巴塞隆拿（3次），世冠盃之王，實至名歸。
皇馬有賓施馬復出，同沙特阿拉伯球會希拉爾鬥攻，場波相當精彩。13分鐘，皇馬翼鋒雲尼斯奧斯祖利亞單刀建功，5分鐘後，華維迪窩利靚波拉開比數，希拉爾首入決賽，但踢得都幾放，26分鐘就由踢過波圖嘅馬列加追成1比2。
換邊後繼續鬥攻，賓施馬同華維迪又各入1球，希拉爾63分鐘再追成2比4；雲尼斯奧斯祖利亞69分鐘禁區內抽入，希拉爾尾段再追至3比5完場。
雲尼斯奧斯祖利亞今場2射1傳，加上4強亦有1個入波，整體表現確實最強，力壓隊友華維迪，當選今次賽事最佳球員。
皇馬喺西甲落後榜首巴塞8分，衞冕冠軍機會並唔樂觀，安察洛堤有些少壓力，近日更盛傳佢會轉教巴西國家隊，巴西足總會將席位懸空，等肥安下季上任。
依家攞番個重要榮譽，總算有交代，肥安亦否認會離隊：「巴西國家隊？我立場好清晰，我同皇馬嘅合約去到2024年。」
