【世冠盃】曼城4:0炒富明尼斯 首支英超5冠王!洛迪又攞獎 2023最佳球員其實係佢!

曼城完成霸業,成為首支登上五冠王寶座嘅英超球隊。世界冠軍球會盃決賽,周五於沙特阿拉伯舉行,曼城憑祖利安艾華利斯交出2入球、1助攻,以4:0大破富明尼斯,歐洲代表連贏11屆。

曼城有「蜘蛛仔」祖利安艾華利斯回歸正選,配合貝拿度施華、科頓攻堅;富明尼斯陣中最有名氣球員,係名牌左閘馬些路,仲有中場甘素、意甲經典硬漢菲臘比美路。

歐聯冠軍已連續10次封王世冠盃,今場曼城亦閃電開紀錄,尼敦阿基中圈截到馬些路長傳,再長驅直進遠射中柱,艾華利斯反應快用心口撞入空門,曼城領先1:0,整個過程40秒,刷新世冠決賽最快入球紀錄。

富明尼斯貫徹巴西傳統,堅持由後場開始組織,有球波係甘素妙傳畀簡奴單刀,扭過出迎嘅艾達臣時被撞倒,球證判12碼,但越位旗早已舉起。曼城大難不死,27分鐘藉連奴擺烏龍,半場領先2:0。72分鐘,曼城拉開比數,蜘蛛仔左路傳中,科頓射入空門。88分鐘,艾華利斯射入埋齋,曼城大炒富明尼斯4:0、首奪世冠盃,連同英超、英足盃、歐聯、歐超盃,榮登五冠王。

曼城主帥哥迪奧拿,亦成為史上首位為3間球會、同時4次贏得世冠盃嘅主帥,至於球員,榮耀盡歸洛迪,呢位西班牙中場當選今次賽事最佳球員,果然係曼城最重要的男人。

洛迪又奪最佳球員。

睇番2023年,洛迪無論隊際及個人均得獎無數,多到嚇親人,當中歐聯、世冠盃都當選最佳球員,可見喺行內人眼中,佢係幾咁出色。數到西班牙國家隊,洛迪亦協助球隊贏歐洲國家聯賽,又係當選賽事最佳球員。

以下係洛迪卡斯簡迪今年贏得獎項:

英超
英足盃
歐聯
歐超盃
世冠盃
歐洲國家聯賽
PFA年度最佳球隊
歐聯最佳球員
歐聯最佳陣容
歐洲國家聯賽最佳球員
世冠盃最佳球員