日本一代短途怪魔「龍王」，相信好多人都記得，而香港都其有後裔服役，包括星期三爭第7場四班1650米嘅「龍來了」。
其實「龍來了」自上季跑新馬賽以來，呢匹由練馬師韋達訓練嘅賽駒，一直以來演出都好穩定，近4場都有獎金落袋，但就硬係贏唔到。嚟緊周中賽事首次配上谷草王潘頓主理，擺到明想借助騎者實力，為「龍來了」打開勝利之門。
「龍來了」上個月已跑過谷草一哩，當晚同「芙蓉莊」一齊由包尾位置飛出外檔狂追，結果「芙蓉莊」贏馬，「龍來了」則以半個馬位之差得第3名。要留意係「芙蓉莊」最近再出跑三班都入Q，可以講「龍來了」呢個第3名水準唔差。
再講，同樣出自父系「龍王」嘅「喜盈寶」，在港兩場頭馬都喺谷草一哩取得，似乎呢系馬谷草性能幾好。韋達繼續安排「龍來了」嚟跑馬地可謂相當之合適。
提到韋達，查實佢今季同潘頓合作過4次，當中有3次入位置，最差嗰次都有第5名，上名率都幾高，唯獨暫未勝出。睇吓今次「龍來了」能否開齋，兼且為騎練今季合作取得零的突破。
