騎師田泰安罰停2個賽日之後，星期三晚谷草賽事復出嘞。雖然唔係「夫卜」騎足9場，但都有8匹坐騎兼全部都喺剛啱嗰場跑入獎金名次，當中包括4匹新勝馬。或者今期夜賽，佢先係主角。
第7場三班1200米，其中1匹要留意當然係「精選威」，呢匹3歲仔跑5次贏取得3W，包括最近嗰次(3月16日)由田泰安贏同程。而當晚「精選威」擊敗嘅對手，期後都有好表現交出。比如亞軍「以戰養戰」再出再上名；第3名「自然輝煌」更成功補中，計賽事水準絕對唔低。今次「精選威」繼續跑三班賽，而且孭磅又適中，再贏多場都唔奇。
第9場三班1650米，「包裝大獎」同樣係田泰安嘅爭勝本錢。老實講，堅要讚一讚練馬師何良，呢匹馬曾經有過傷病挫折，但今季養返好兼近兩場取得連捷。再講，跑到季尾階段，唔少馬都搏得七七八八，「包裝大獎」今季只跑過4次，體力方面應該有優勢。排到個內檔兼谷草一哩又係強項，何良本身又要爭吓成績，今次田泰安實砌盡佢。
另外，頭場田泰安騎嘅「勝出魅力」雖然唔係新勝，但越跑越穩定都值得關注。呢匹出自父系「勝利喝采」(Acclamation)嘅英愛馬，戰鬥力當然唔高啦，如果唔係點會落到五班吖。不過睇返季內田泰安同呢系馬都幾夾，比如打吡冠軍「浪漫勇士」以及「閃電」，話唔定幫到「勝出魅力」開齋。
