練馬師呂健威與騎師潘頓，今季合作成績相信之好，暫時已經攞到16W。呢對騎練組合喺周中谷草夜都有唔少好嘢，包括第5場四班1000米嘅初出馬「魅力一丁」。
「魅力」系掌舵人鄧偉彬都係資深馬主，唔少賽駒都係佢聯同仔女擁有。純計佢自己綵衣黃衫紫星星星圖案的話，近期啲就有「魅力知寶」。而今次呢匹「魅力一丁」，無論血統以及試閘表現都幾吸睛，有機會一即出勝。
既係出自近年大旺父系「遙遠星空」，同父馬包括一級賽盟主「顯心星」，另外「夢想成金」、「糖糖幸運」、「加州得迅」等等，都交出良好成績。預期「魅力一丁」都會適合香港競賽環境，特別喺短途賽方面。
「魅力一丁」來港後曾4度試閘，2月初首試田草800米閘就已經展示潛力，一放到底先過終點。2月25日試田草1000米閘就以第3名完成，呢課閘跑第1係之前介紹過兼一出即贏嘅「識贏」。去到3月8日再試田草1000米閘，「魅力一丁」又以輕鬆姿態首名觸線。最近1次就轉去泥閘試吓，或者場地不合走勢就一般。
從4次試閘推斷，「魅力一丁」係匹有前速嘅早熟短途快馬，今次報1000米賽事絕對合適。另外就係泥地似乎仲未適應，最曳嗰課就係泥閘。不過「魅力一丁」只係3歲，之後有超大改變都唔出奇，尤其母線方面有濃厚北美背景，照計都有啲泥地潛能。
再講講數據，原來呂健威今季只畀過一匹初出馬潘頓策騎，嗰匹就係一出即勝嘅「包裝必勝」。另外「魅力一丁」排8檔起步都係有利因素，因近3季谷草A欄1000米，8檔嘅勝出率屬第2高，僅次於黃金1檔。「魅力一丁」有晒爭勝條件，無理由睇少。
