香港時星期日下午2時40分，日本阪神競馬場上演草地2000米一級賽大阪盃。焦點當然會落喺應屆日本馬王「樂透心」身上。不過佢唔係無對手，4歲仔「金積驥」近期個勢好勁，有力突圍而出。
有個數據要分享一吓，就係自2012年至今，大阪盃得主全部都係以關西區栗東作訓練基地。唔知係咪怕咗魔咒，所屬於關東區美浦訓練基地嘅「樂透心」，提早少少出發以適應環境，希望可打破栗東馬連勝紀錄。至於挑戰者「金積驥」，就無地區差異煩惱，以逸待勞爭取首項一級賽殊榮。
講起呢匹「金積驥」都幾遲熟，2歲至3歲初期都無乜睇頭。直到上年9月開始大爆發，由只限1場勝利條件賽計起，一口氣取得5連勝，包括2022年贏表列賽白富士錦標，以及二級賽金鯱賞，而且所擊敗嘅對手都唔簡單。
白富士錦標砌低一級賽皋月賞殿軍「頌讚導航」。至於金鯱賞就仲堅，擊敗上年大阪盃冠軍「麗冠花環」以及一級賽日本女皇伊利沙伯二世盃得主「紅線情牽」。
咪以鍊贏2匹G1得主係「符碌」呀，當日「金積驥」以破場地紀錄1分57秒2由頭放到尾，表現比之前更進一步。「金積驥」有晒實際賽績證明之後，練馬師藤岡健一先至幫佢報跑今年大阪盃。路程方面都唔使擔心，因「金積驥」跑過9次，全部都係草地2000米，從來都無轉過路程，包括今次大阪盃。
