嚟緊星期日(4月17日)將越洋轉播日本二千堅尼賽日，比賽地點為中山競馬場，其中7場賽事有得睇又有得玩。早上11:55分開波，留意場次編號呀！
至於重頭戲當然係三冠首冠日本二千堅尼(草地2000米一級賽)，亦即係日語皋月賞。其中一匹爭分子ONYANKOPON，馬會譯名由原來「偉績豐功」，突然改為「天空神」，情況屬近期少見，相信同佢名有多種意思有關。
有番咁上下人生資歷的話，相信對過日本藝能界有一定認識，而ONYANKO其實就係80年代女子偶像團隊小貓俱樂部。當年成員包括工藤靜香、岩井由紀子等等。據講現時AKB48以及乃木坂46，都係參照小貓俱樂部而成，可謂女團文化界嘅textbook。
另外，ONYANKOPON於非洲阿坎族語言代表偉大嘅人，創造宇宙萬物嘅天神。而因為呢個名咁把炮，卡通《進擊之巨人》裡面嘅飛機師兼工程師歐良果彭，其實個名就係ONYANKOPON。
據悉，馬仔第1次出賽時，因個名幾得意而受到廣泛關注。馬主田原邦男都知道個名有多種意思，仲喺訪問中表示自己都係小貓俱樂部同埋進擊之巨人嘅忠實fans。
