以往騎師田泰安泥地成績相當好，唯今季都跑到中後段，田泰安泥地賽只係贏過3W。但唔緊要，星期三晚全泥夜賽，就畀呢位打吡冠軍騎師追落後。留意到第一口孖T有超過80萬多寶，就用晒田泰安坐騎嚟做膽。
第3場四班泥地1200米，初出馬「顏色王子」隨時一鳴驚人。呢4歲馬匹出自父系Per Incanto，在港唔少同父馬都喺泥地交過好成績，相信「顏色王子」都唔例外。事關佢最近期試過1050米泥閘，同組包括高分馬「當家猴王」、4捷馬「超速」等等，但「顏色王子」仍可一放到底率先過終點，走勢相當之吸引。
再講，今場賽事對手都幾弱，除咗「添有運」之外，其他參賽馬最近1場都不入前5名，好多仲跑緊雙位數名次。「顏色王子」只唔太差，要入三甲席位應該唔難。
第4場五班泥地1200米，「帝豪寶駒」唔好睇少。今季又跑泥又跑草，表現最好依然都係泥地1200米，季內2次都入到頭4名。實在「帝豪寶駒」最近1次贏馬同現時評分一樣都係33分，證明呢個水平都有競爭力。
老實講，都預咗佢出閘例慢半拍，但勝在直路總會爆一段你睇。天文台話今明2日都有驟雨，泥層跑道濕濕哋隨時仲啱追，季內首場「帝豪寶駒」攞季軍，就係濕慢泥地1200米後追上名。
