終於爆喇！經過6場正路戰果，16強產生首隊出線冷門，西班牙喺90分鐘同加時都唔識入波，只能悶和摩洛哥0:0，到互射12碼3球全宴客，輸0:3被擯出局。
西班牙出局，只能怪前線冇力，全場77％控球率，但得個搓字，加上又黑仔，加時換入嚟嘅聖日耳門前鋒沙拉比亞，完場前抽射同互射12碼都中柱，都算係天意。
摩洛哥面對狂攻，咬到盡死守，突擊亦有威脅，心理素質及部署，勝過同樣入16強嘅日本同南韓，能夠爆冷首名出線，繼而再踢走西班牙，絕非純粹僥倖。
西班牙一貫強力控球，今仗場面上依然全面佔據主動，上半場控球率近70%，但對手中後場非常硬淨，令西班牙真正有威脅埋門唔多。
摩洛哥雖然主力穩守，但薛耶治、保法爾兩路側擊，有腳法又有速度，不斷侵襲對手防線。最接近入波係43分鐘，中堅阿古特近門頭槌攻門，僅僅高出。
下半場西班牙繼續主動，但攻勢始終欠銳利，箭頭馬高阿辛斯奧冇乜表現，63分鐘都係要出番艾華路莫拉達。莫拉達出咗，西班牙攻勢到肉番啲，不過摩洛哥都頂得住，令賽事要進入加時。
西班牙搓得唔入得，加時出埋最後武器，換入巴塞隆拿天才安素法迪。但未入到波之餘，13分鐘更幾乎失守，後備前鋒查迪拉面對龍門近射，烏尼西蒙僅僅用腳閂出。補時最後一刻，西班牙沙拉比亞窄位狂抽，但又中遠柱唔入，令勝負要由互射12碼分出。
極刑對決，亦係兩個西甲門將較量，西班牙烏尼西蒙効力畢爾包、耶辛尼保奴來自西維爾。
西班牙第一個射12碼係沙拉比亞，佢加時下半場入替，除咗最後一刻射中柱，去到12碼又係中柱，超級黑仔。之後卡路士蘇拿、布斯基斯主射都宴客，耶辛尼保奴救晒3個12碼，成為摩洛哥晉級英雄，賽後更畀隊友拋上天慶祝。
摩洛哥成為繼喀麥隆（1986）、塞內加爾（2002）及加納（2010）後，第4支非洲球隊晉級8強，周六晚11時將對葡萄牙或瑞士。
