已經有好幾個賽日，騎師莫雷拉未有幫練馬師方嘉柏贏馬。直到啱啱過去嘅星期日，呢對騎練就憑「神彩勇士」再取勝利，相信雙方未來日子會繼續合作攞好成績。就好似今個星期三，「夫卜」嘅莫雷拉頭6場坐騎，全部都出自方嘉柏，睇嚟有料到。
其中第4場四班1650米，莫雷拉再次策騎「寶賢得得」出賽。現時4歲嘅「寶賢得得」，上個月跑同程排到個11檔，但縮埋衝一段都有季軍。谷草一哩經常都跑近而未贏，今次再用莫雷拉應該有心求開齋。
第5場四班1200米，「飛騰騅」首度配莫雷拉亦都唔好睇少。最近跑同程就以第9名過終點，沿途又畀「八心之威」撞過，臨轉彎又曾經受干擾而收慢。跑得唔順，難怪評磅無減佢分。首度戴眼罩希望跟返前多少，跑返之前成日入前4名嘅表現，爭勝機會都唔低。
第6場四班1650米，「快步速」最近跑田草1400米用意都好明顯，順利減分重返四班。方嘉柏即打王牌報谷草一哩兼強配，大反彈絕唔出奇。其實「快步速」歷來4W全部都喺四班，呢舖實砌。
