近年英國打吡冠軍有個特色，就係贏個位並非大名氣或者一線騎師。比如2017年打吡冠軍「巨鷹拍翼」，騎師係白堅。2019年「御用畫匠」，騎師為許覺得能。2020年麥理文騎「蛇紋石」爆冷奪標，2021年卡比憑「雅大爺」捧盃。
若果跟住呢個特性，大家揀馬時就唔使咁拘謹，不妨大膽多少，隨時會有唔錯回報。就好似練馬師岳伯仁陣營嘅「換崗儀式」，屬其中1匹近績唔差而又有好賠率嘅參賽馬。佢2歲時表現完全唔起眼，跑過3次都未贏過。但今年4月復出即大變身，於愛爾蘭跑場3歲處女馬賽，結果喺2136米膠沙地上一放到底成功開齋，當日騎師為羅敦。
見佢表現突然神勇，岳伯仁就即刻畀啲考驗佢，報跑頗有指標性嘅打吡預賽，草地2457米三級賽車士達銀瓶，騎師亦換上主帥莫雅。而「換崗儀式」再次使出放頭戰術，結果大勝對手6個半馬位。呢場勝利帶來2個啟示，首先係「換崗儀式」跑草地無問題，其次係哩半途程都應付到。今次回配羅敦策騎，話唔定又有驚喜。
講開有指標性打吡預賽，當然唔少得2051米二級賽東帝錦標，過往有唔少打吡冠軍，比如「班尼迪」、「北方之光」、「發動力」、「授權」、「勞動力」以及「金號角」，都係跑呢場作為lead up。而今年東帝錦標冠軍「稱冠沙漠」，相信會係爭勝分子之一。呢匹出自父系「天賜寶駒」嘅馬仔，跑過2場都贏晒，仲有幾多喺手都未知。最重要係騎師繼續用金誠剛，符合返上文提及到嘅特色，就係非名牌騎師策騎。
