英國馬季正式開波，打頭炮就係限3歲馬參加嘅1600米一級賽英國二千堅尼。其中一匹要留意係出自高多芬陣營嘅「原野步道」，跑過5場全部贏晒，早就畀海外博彩公司列為大熱門。
唔係話呢匹出自父系「綠洲夢」嘅雄馬唔叻仔，之不過3歲馬賽事都要鬥吓成熟同埋進度，無乜分頭的話不如試試其他參賽馬。好似匹「完匹力量」，絕對有能力突圍而出，海外賠率暫時為9至11倍。
由練馬師范鴻禧訓練嘅「完備力量」，自上年5月出道至今跑過7場賽事，取得5冠1季佳績。呢匹馬最初由前英國冠軍騎師韓立勤主理，但7月出爭G2利治蒙錦標時表現一般，喺直路未能望空衝刺，臨終點前又有多少外閃。唔知係咪主理人嫌韓立勤發揮唔太理想，8月去法國多維爾馬場跑G1莫尼大賽，就改由蘇銘倫策騎，當時香港都有越洋轉播。
一換人後，「完備力量」即刻唔同晒，唔單止贏莫尼大賽，9月於英國新市場跑G1中央公園錦標更輕勝而回。今年4月復出跑三級賽格拉咸錦標，蘇銘倫一早咬住個二三位，末段催策之下以個幾馬位先過終點。今次出爭英國二千堅尼，繼續用返人馬合作取得百份百勝率嘅蘇銘倫，相信機會都唔低。
講開又講，因受惠於阿仔「完備力量」交到貨，佢父系「雅德樂團」嘅配種亦都大幅提升。2021年只要4000英鎊就有交易，今年就加到12,500英鎊。加幅超過300%，認真狼死。
