去到季尾階段，練馬師榜一如以往頭有頭爭，尾有尾爭。而暫時頭馬數字仍然處於個位數嘅鄭俊偉，當然要繼續努力，望於餘下賽事爭取更多頭馬，鬥志無疑當然要吼實。
留意到星期日編有2場泥地賽，米高鄭就派出一對美國馬參加，包括第5場「友盈友福」以及第8場「牛皇頭」。似乎想利用美國馬嘅場地性能，於泥層跑道上建功。
第5場四班泥地1200米，「友盈友福」當然其中1匹爭勝分子。呢匹出自父系War Front嘅美國馬，在港2度上名同屬泥地賽，包括最近於泥地1200米取得亞軍。今次唔再轉換路程之餘，兼且卜定前列騎師田泰安主理，爭勝決心都好明顯。
第8場三班泥地1200米，「牛皇頭」都值得一試。最近佢走去跑谷草1200米，可能唔太合適最終以第11名過終點，近績方面確無太多支持。不過今次重返泥地就唔好睇少，查實「牛皇頭」在港跑過4次，唯一有獎金就係泥地1200米，而同父馬「印水紙」，在港2W皆泥地。相信「牛皇頭」喺泥地先發揮到最大威力。
仲有個要點值得提出，就係鄭俊偉好少與騎師何澤堯合作，開季至今只得6次咁大把，當中取得1冠1季，咁啱呢2次都係泥地賽，話唔定呢舖又有驚喜。
