今個星期日將會舉行日本打吡，亦都係三冠系列次關。而騎師福永祐一將會繼續策騎「地標圖形」，出爭是項2400米一級賽，若果勝出的話，福永祐一將解鎖一項新紀錄，就係單一騎師連續三年摘下日本打吡桂冠。
睇翻歷史，從未有騎師可連續3年贏得日本打吡，就算全盛期嘅武豐都唔得。武大哥曾連贏1998及99年日本打吡，2000年武豐騎大熱門「空中神宮」出爭呢項錦標，諗住可以完全三連霸偉業，無奈以馬鼻輸畀「愛麗航程」。另外，騎師四位洋文曾於2007及2008年先後憑「伏特加」與「天空深處」贏得日本打吡，但2009年就無座騎跑打吡。
至於福永祐一，近4年日本打吡贏過3次，包括最近2年憑「鐵鳥翱天」及「大帝」奪魁。而今年福永祐一喺打吡又叫糊嘞，其座騎「地標圖形」已經喺三冠首冠皋月賞展示過實力，騎幾步就彈甩「春秋分」成個馬位先過終點。
對於「地標圖形」有無哩半長力，福永祐一話唔太擔心，當日場地狀況先至係最大隱憂。睇嚟福永祐一要成為首位打吡三連霸騎師，真係要望天公造美。
