今日就有官方公布，賽事獎金會有提升。其中一項較受關注係一至三班中長途賽(1600至2400米)，獎金大增幅增加，百分比超過20%。據公布所講，為解決馬匹數目結構問題，尤其係高班馬及中距離馬的數目有下降趨勢，決定推出新的獎金及特別獎金制度。
加獎金當然係好事，但如果有改變結構嘅決心，淨係加錢未必夠力度。查實馬主偏向買短途馬，理由好簡單，因為香港短途賽為主。若然唔考慮增加中長途賽事，呢個結構唔會有好大改變。就以2400米賽事為例，一季只跑3場兼全部都係分級賽，包括香港瓶、皇太后紀念盃以及遮打盃。而就算1800至2200米嘅比賽，都唔多短途賽多。
馬主買匹馬嚟香港跑，夠氣跑哩半之餘仲要夠高分先跑到分級賽，難度咁高自然令人卻步。倒不如買匹短途馬，跑唔到分級賽都有大把賽事可以報名，咁先過到跑馬癮吖嘛。香港做得馬主個個有錢，除非獎金去到好似沙特盃或者杜拜世界盃咁嘅級數，如果唔係加幾十萬獎金未必吸引到佢哋買匹勁嘅長途馬。
當然，公布裡面無提到會唔會增加相關賽事，或者已經作出賽事配合兼有新賽事編排，只係段文無提到主要講獎金所以無提到。真心，玩短途、中途定係長途其實無所謂，反正都會投注。只係想講解決問題要從根本出發，針對問題癥結先係王道。
