星期日田草11場賽事，除咗3場一級賽頭之外，其他場次都有唔少初出馬值得留意。包括第2場四班1200米，蘇氏家族名下嘅「同聲同氣」。呢匹3歲仔出自父系「美式法老」，話晒都係美國三冠馬王，紙上資料都有啲睇頭。
其實馬主蘇啟聲先牛十幾年前都有匹同名嘅「同聲同氣」，成績當唔錯架，贏過5W兼評分上過97分。至於今次呢匹「同聲同氣」，相信都有一定潛質。2月份首次試閘仲見佢大大隻未修身，跑落勁度一般。但之後3次試閘走勢有好大改進，有一定前速之餘，3次都以首兩名過終點。
「同聲同氣」公布體重有成1230磅，3歲仔咁重秤可能遺傳到父系「美式法老」早熟嘅特性。另外要提出一點，雖然「美式法老」係泥地霸王，但佢已經有唔少子嗣贏過草地分級賽，比如喺越洋轉播賽見過嘅「梵高」，就贏過法國G1聖格盧準則大賽。估計呢匹「同聲同氣」無論泥地定係草地都無所謂，跑一哩應該仲好。
另外都想提一提第1場四班1200米，初出馬「龍船快」。雖然個檔位就差啲，但都不妨留意吓走勢。佢老豆就係曾經來港贏女皇盃嘅「雕塑家」，而後代兼全兄弟「馬克羅斯」以及「歡樂之光」都贏過香港盃，相信「龍船快」好快可以適應到香港競賽環境。今次跑1200米係嫌短，咪當熱吓身開氣囉，往後或者要跑到1800米以上。
