星期日沙田馬場10場賽事，當中有唔少初出馬登場，包括第5場四班1200米嘅「識贏」。呢匹由練馬師羅富全訓練嘅3歲馬，出自父系Burgundy。在港同父馬雖然唔多，但絕大部份都能夠勝出或上名，比如3W8P嘅「馬爾代夫」。另外「紅鬃烈馬」及「霹靂狂龍」各自交出2場頭馬，睇嚟呢系馬都幾適應香港競賽環境。
「識贏」來港後進行過3次試閘，全部都由騎師莫雷拉親試兼以頭2名過終點，試落有前速以及相當之成熟。實在去年仲喺紐西蘭時，「識贏」喺當地2次試閘都係以首名衝線，可見佢已經做好準備先至出賽。而比較起同場幾匹3歲初出馬試閘表現，例如「極速俠」、「神舟十二」與「星叻無敵」，「識贏」嘅走勢確實搶鏡得多。縱然首次出賽就排到個最外檔，但以佢銳利前速應該夠快切入內檔，未必一定會外疊轉彎。
留意到「識贏」母系Diamond Babe，曾經生過匹由練馬師丁冠豪訓練嘅「鑽石福星」，而今季「鑽石福星」曾於一哩及1800米勝出，谷草2200米亦都上名。估計「識贏」去到4至5歲之時，可能跑一哩仲正。補充多點，羅富全用埋王牌為「識贏」報名，應該有一定決心。
