'

有信念有堅持,終點不遠矣

今年香港打吡都有唔少話題,而其中一匹爭勝分子「浪漫勇士」必定要講吓。「浪漫勇士」馬主劉栢輝先生,正正就係連鎖家品店日本城老闆。劉先生向來熱愛賽馬運動,而他永不言敗,鍥而不捨嘅精神,其實好值得我哋學習。

由灣仔雜貨舖,去到1991於北角開設首間日本城,再到2013年上市。逾卅載商場打拼生涯,話無遇過困難就呃你。特別係零售市場,對於外圍環境極為敏感,加上年年月月月日日都有新對手湧現,要保持競爭力坐穩前列位置確實唔易。能夠成功突圍而出,總有其過人之處。正如之前提及到,劉先生有份打不死精神,先至能夠走到行頭頂端。雖然成功秘訣大家都聽唔少,但正所謂知易行難,真正做到又有幾個?

其實養馬亦一樣,劉先生之前亦遇過唔少困難同打擊。早年有匹「家品大王」,來港跑超過廿場都未贏過。「浪漫鐵人」贏過,但跑唔夠10場又退役。而講到打擊最大,一定係香港國際馬匹拍賣會引入嘅「家品皇者」。劉先生以1050萬港元購入,交易價亦打破史上紀錄。呢匹千萬名駒一出即勝,帶畀人無限憧憬,點知操練出意外無奈退役。所以今日有匹「浪漫勇士」能走入打吡大舞台,確實係來之不易

無論「家品皇者」、「浪漫鐵人」、抑或「浪漫勇士」,全部都來自香港國際馬匹拍賣會,全部都交由練馬師沈集成訓練。可見這份堅持,由商場一直延伸到馬場。無人話堅持就代表一定成功,但無堅持的話,距離成功目標就變得遙遠。香港打吡跑2000米,「浪漫勇士」有無長力真係唔知。但正如馬主劉栢輝先生一樣,堅持吧!你會先到終點。