30歲，仍然值6000萬鎊轉會費！卡斯米路打出世界級防中水準，補時4分鐘更攻入加盟後首個士哥，助曼聯作客1:1迫和車路士。
雖然驚險，但曼聯今仗平均表現係幾好，特別係卡斯米路，呢位巴西中場越踢越有，同艾歷臣亦相當合拍，攻守協調，更喺上半場初段控制大局，連環製造險象。
不過車路士主帥樸達反應真係好快，而且夠薑夠狠，上半場見勢色唔對，喺36分鐘就即時換人，收起古古列拿，將5人防線轉為4人，加多個人手同卡斯米路、艾歷臣搶中場。
樸達上任後，連埋今仗同早前歐聯，8戰共得5勝3和，龍門阿列沙巴拿加經常力挽狂瀾，今場對住曼聯，Kepa剩係上半場，已救出拉舒福特單刀同近射，以及安東尼嘅死角波。
C朗對熱刺未完場擅自走人，被罰今仗冇得隨隊兼獨自操練，好大機會明年一月轉會，下家大熱正係車路士。其實又難怪，車仔中後場守得好好，但奈何攻力唔夠，今仗對曼聯防線始終欠缺致命威脅。
下半場出返嚟，車仔變陣後搶番唔少控球權，去到60分鐘，曼聯中堅華拉尼受傷後爆喊，似乎佢自己都心知不妙，或緣盡世界盃。戰至87分鐘，曼聯後備麥湯文尼喺禁區內拉跌波查，車仔得到12碼，佐真奴費路主射破網。
曼聯谷住度氣，拚死反攻，補時4分鐘，卡斯米路接應傳中頂出拋物線頭槌，終於收死Kepa。各得1分後，兩隊依然守住第4及5位，但如果紐卡素今晚擊敗熱刺，就可以過晒佢哋頭。
曼城主場3:1贏白禮頓，落後榜首阿仙奴1分，但多踢1場。經過1場入球荒後，呢個男人又番嚟喇！艾寧夏蘭特梅開二度，11場英超喪入17球，開紀錄嗰球，更加係接應龍門長傳，轉身即跑，一個人衝散整條白禮頓防線，單刀建功，完全係力的表現，恐怖！
曼城贏波後，又創造紀錄，成為英超史上，首支主場10連勝，兼10場入波都有3球或以上嘅球隊。
謝拉特周中被維拉解僱，好多人都即時諗，下個會唔會輪到林柏特。林伯壓力暫時紓緩，愛華頓主場大勝水晶宮3:0，強勢回歸嘅卡維特利雲都有波入。
