杜拜司馬經典賽向來都係好戲碼，今年亦都一樣，特別係日本兵團派出5匹馬去爭呢個錦標，擺到明志在必得。
查實上年一對日本馬「創世駒」同埋「唯獨愛你」已經好有機會勝出，點知輸畀當時大勇嘅「萬勝飛」。既然谷住條氣，今舖就玩大佢，喪派馬參加，總之唔打得都睇得，一於晒你冷。
5匹日本馬當中，總大將當然係評分達123分嘅「耀滿瓶」啦。去年12月喺莫雷拉跨下贏香港瓶之後就休息，儲足體力跑呢場杜拜司馬經典賽。仲特登搵到蘇銘倫執韁，決心有幾大可想而知。至於同馬主嘅「威信英明」都唔少料，佢一早就嚟到中東比賽，上個月於沙特盃賽日贏咗2100米三級賽未來城草地賽，對中東環境都幾適應，屬其中一匹爭勝分子。
歐洲隊方面，一定要提評分120分嘅「致勝一擊」。佢12月喺香港瓶取亞軍，就係輸畀冠軍「耀滿瓶」。今次再同「耀滿瓶」鍊過，應該都幾好睇。另外雙方騎師唔同咗，基於「致勝一擊」主策騎師戴馬田傷咗膝頭，佢外父兼練馬師莫爾就搵到神枱級師傅戴圖理幫手。戴圖理歷史上曾3奪杜拜司馬經典賽，或者比戴馬田仲好。
主人家高多芬團隊爭標希望就係「伊比爾族」，呢匹馬由英國贏到去美國，包括去年11月贏得草地2400米一級賽美國育馬者盃草地大賽，計級數絕無輸蝕。值得一提係騎師布宜學曾4勝是項錦標，年份為2010、2017、2018及2019，一樣唔可以睇少。衰在排到個12檔，唯有靠騎者臨場執生。
