剛啱星期三全泥夜賽，華將黃皓楠終於憑「天足貓」打開今季勝利之門，令仲未開齋嘅華將只剩低黎海榮以及巫顯東。嚟緊星期日跑谷草日賽，黎海榮同埋巫顯東坐騎依舊唔多，都係一隻起兩隻止，但從賽績上都有可取之道，話唔定可以打破困局。
先講黎海榮，全日聘約就只有一隻「電子傳奇」，報跑第8場三班1650米。呢匹澳洲馬上季取2冠2亞皆於谷草一哩，表現都相當穩定。而今季初出亦即開鑼日，突然跑田草兼且嫌短嘅1200米，唔少人都諗住熱身居多，點知咁都跑到第2名，只係輸畀已突破80分嘅「東方飛影」。
唔好忘記，當日跑第4名嘅「連連有盈」之後跑兩場都上名，另外第5名嘅「幸運旅程」之後再取1冠1季。可見「電子傳奇」呢場亞軍，水準絕對唔差。今次重返最耍家嘅谷草一哩，兼且孭全場最輕120磅，競爭力比起開鑼日跑田草肯定有所提升。最重要係練馬師文家良夠義氣，搵返黎海榮再騎「電子傳奇」，呢位G1騎師當然要把握良機啦！
第9場二班1200米，巫顯東就會策騎「和氣生財」。眾所周知「和氣生財」係正宗谷草馬，在港4W全部都係谷草。但剛啱嗰場竟然走去跑田草三級賽國慶盃，對手強之餘場地又唔啱，無表現可謂相當合理。唯輸完獲評磅員減2分，啱啱好可以跑到呢場二班谷草賽事，成個形勢就正面返晒。有個數據一定要提出，就係「和氣生財」過往2次排7檔都贏馬，星期日又再抽到呢個幸運檔位，莫非係勝利啟示！
