'

拒絕失蹤 賀銘年破悶局

現時在港發展嘅歐洲騎師,包括巴度、班德禮以及賀銘年。除巴度較為理想之外,班德禮與賀銘年受支持力度都唔大,頭馬數目自然偏低。不過捱捱吓又見好轉喎,好似班德禮咁,剛啱喺谷草起孖。而星期日沙田泥草混合賽日,隨時論到賀銘年威威。

賀銘年已經連續5個賽日無上名,名符其實「披都唔披吓」。但今期賽事都有幾匹具競爭力座騎,話唔定可為佢帶來突破。其中1匹有靚績支持,就出爭第3場二班2000米嘅「健康快駒」。

呢匹4歲馬今年都幾叻仔,已經取得4勝1亞1季,相信仲有進步空間。鑑於騎開嘅莫雷拉以及巴度都另作他選,「健康快駒」今次都改由賀銘年主理。雖然話首度跑2000米,但以其跑法以及母系家族賽績推斷,呢個路程都應該扳得到,三甲預埋佢。

第6場四班1200米,「白鷺高超」當然係爭勝分子之一。跑過3次取得1冠1亞,包括上賽於同程跑第2名。唔好忘記,當日係壓過星期日再同場嘅「加州威勝」。而「白鷺高超」前次贏馬,亦都拋甩再同場嘅「閃電俠」。依家喺四班作賽,點計都有啲著數。

第7場1600米國際三級賽獅子山錦標,「勝得精彩」隔晚有成10倍都幾吸引。最近「勝得精彩」出爭G1冠軍一哩賽,平磅之下只係以2個半馬位落後於馬王「金鎗六十」。依家落返嚟跑三級賽,計班底絕唔輸蝕。話晒佢曾經喺田草一哩造過1分33秒以內,更加唔敢睇少。