子承父業的例子不少，特別是日本，由規模較細嘅傳統手工藝、成衣、餐飲業，大至汽車廠及電子零件廠，而日本馬壇亦一樣。
就好似今年先至正式出賽嘅女騎師今村聖奈，爸爸就係已退役騎師今村康成。而福永祐一的爸爸福永洋一，以前都係做騎師。而近年冒起速度極快嘅21歲騎師岩田望來，佢老豆就係騎「龍王」騎到舞龍咁嘅岩田康誠。
岩田望來今年好叻叻，暫時係騎師榜以42W排行次席。2月更憑「樂桃源」贏得草地1400米三級賽京都牝馬錦標，亦係佢職業生涯首項分級勝利。身為岩田康誠嘅二仔，望來由細到大都受到賽馬薰陶，所以2016年就入讀騎術學校，2019年就正式出道，當年更以37場頭馬，奪得新人騎手特別賞，對於岩田望來可謂相當之鼓舞，老豆岩田康誠亦都老懷安慰。
隨後兩年，望來成績不斷進步。2020年取得76W，2021年就有88W。今年未去到6月，岩田望來已經有42場勝利，相信要突破去年頭馬數字應該唔難，望來亦訂下年度百勝為目標。
當然，要成為一流騎師，點都要有分級賽勝利為CV貼金。岩田望來嚟緊周日，將會策騎Sublime Anthem出爭3歲雌馬首關櫻花賞。呢匹馬女近5場非冠即亞，包括喺三級賽䧳馬預賽(Fillies’ Revue)勝出。有好近績支持，話唔定會成為岩田望來首場G1勝利。巧合嘅係，老豆岩田康誠嘅招牌馬之一「龍王」，正正係Sublime Anthem父系。
