上個星期三，騎練組合韋達及潘頓就憑「龍來了」，取得今季首次勝利。嚟到本周中谷草夜賽，潘頓又有機會開同馬房account，所講就係高伯新馬房嘅「怪獸媽媽」。呢匹五班馬轉投高伯新後只近未勝，今次再度搵潘頓幫手，相信都幾有決心求勝。
第1場五班1000米，「怪獸媽媽」肯定係其中1匹爭勝分子。最近跑過場同班同程賽事，結果只係以鼻位之差不敵「萬事有」取亞軍。要留意當時「怪獸媽媽」排9檔起步，早段都要耗多少力切入。需短道呢類快鬥快場合乃纖毫之爭，用力多咗或成勝負關鍵。唯今次「怪獸媽媽」排到個3檔，相信早段會比較為輕鬆，對爭勝必有幫助。
數據上亦對「怪獸媽媽」有利，近3季谷草C欄1000米，3檔馬勝出率最高，錄得接近30%，而呢個比率完全爆開第2位嘅5檔以及7檔，後兩者勝出率只得14%。
提到潘頓，第2場五班1650米，文家良馬房「天衣無縫」，今次首度配潘頓應該有計。實在今季「天衣無縫」經常喺四班跑近，包括最近喺谷草1800米取得殿軍。周中重返最低班次比賽，谷草1650米又係佢最耍家路程，競爭力自然提升。
再講，季內潘頓與文家良組合贏過3W兼全部都係谷草，今舖當然唔可以睇少。所以話周三第1口五班賽孖寶，由潘頓包辦都唔奇。
