星期六有2場95分或以上一班賽，其中第7場1200米賽事都有唔少明星馬參加，包括短途新貴「八仟師」。最近佢就係同程失利跑尾二，但唔好咁快批死佢住，今次形勢唔同不妨睇多鋪。
1月23日「八仟師」就膽粗粗挑戰一級賽百週年紀念短途盃，點知排到個最外檔，沿途頂喺外疊埋無遮擋，兼且騎師蔡明紹又唔熟手。入到直路已經無晒競爭力，如是者倒數第2過終點，亦係「八仟師」首場敗績。
不過今次就唔同晒，一來換返人馬合作勝率達百份百嘅莫雷拉策騎。二來跑讓磅賽，「八仟師」只係孭114磅，就算加埋莫雷拉超磅都係116磅。背上負擔減輕，自然有助發揮啦。最重要排到4檔，相信唔會學似上次咁輕彎瘋狂蝕位。
實在「八仟師」最近試咗個1050米泥閘，表現相當之好，全程無推過以次名完成，只係以半個身位落後於啱啱喺周三贏馬嘅「緊張大師」，計狀態絕對唔差。「八仟師」只係4歲仔，應該仲有多少進步，周末能夠大翻身唔出奇。
