騎師周俊樂將於4月16日迎接22歲生日，套用老前輩思維的話，實會諗諗佢有無賀壽馬。今個周末本地10場賽事，周師傅雖然坐騎唔多得6隻，但睇落都有一定競爭力。
就好似第2場四班泥地1200米，「勁得手」今次繼續由周俊樂值得睇好。「勁得手」歷來4W全部泥地1200米，今季成日走去跑草地都知練馬師容天鵬用意。去到3月尾一返到強項泥地1200米即刻交出凌厲追勢以第5名過終點。留意到當日頭兩名都係擺前走，「勁得手」屬少數後上跑近賽駒，而且末段時間最快都係佢，可見之前跑草地減分已有成效。
再講，「勁得手」最近1次頭馬就係用周俊樂，人馬合作早有證明。仲有喎，剛啱星期三周俊樂騎容天鵬旗下冷門「確妙星」都攞到亞軍，話唔定呢對騎練今舖可以威返次。
提到騎練合作，周俊樂除咗同韋達成日有頭馬之外，佢同練馬師文家良一樣有靚數據。雖然「周文」組合今季合作唔夠廿次，但已經攞到3W2P。周六賽事文家良又有三隻都畀周俊樂主理，焦點一定係第7場三班1000米嘅「神速奔馳」。
「神速奔馳」跑過3次皆田草1000米兼全部由周俊樂策騎，2月份首次出賽已取亞軍，及後2場都順利贏馬，當中以最近嗰場贏得最輕鬆，拋離對手4個馬位，睇落應仲有上升空間。加上今次抽到個9檔，相信好快就可以貼到外欄，想過佢都唔容易。
