'

呢舖十三么食得出

跑谷草梗係留意檔位,排內檔點都加啲分。中長途都話有時間畀騎師調整吓,但跑短途就窄使,尤其係1200米。一出閘就轉彎,掟咗出三四疊都唔知點算。而第4場四班1200米,排最內檔嘅「國士無雙」,勝機應該唔低。難得抽到個1檔,有望打開勝利之門。

「國士無雙」呢個四字詞語本來係解獨一無二嘅人才,據聞係讚美韓信,總之就形容最醒最叻啦。而日本麻將就用呢個四字詞語,去代表最勁嘅十三么,即係役滿番數爆棚。而由練馬師方嘉柏訓練嘅4歲馬,個外語名叫Kokushi Musou係日本羅馬音,同樣係解「國士無雙」。

講返呢匹出自父系「防撞裝置」嘅紐西蘭馬,最近就跑過場谷草1200米取得季軍,走勢都幾令人驚喜。值得一提係,當日冠軍「金鑽貴人」以及殿軍「秒秒精彩」再出即贏馬,可見賽事水準都幾高。留意到今期賽事方嘉柏出馬唔少,睇個勢都有頭馬交出,話唔定呢匹「國士無雙」係其中一匹。