周中谷草又跑9場賽事，其中1匹蔡約翰打王牌出賽嘅係第4場8號「自勝者強」。見個馬名咁古色古香，再睇埋件綵衣，馬主果然係陳國聰先生。
近年陳先生名下賽駒，名字都好有個人特色。其一係中文名與《道德經》及《孫子兵法》有關。另外馬匹嘅外語名稱方面，多為歷任英超車路士領隊。比如七捷馬「以奇用兵」，名字就出自《道德經》第57章，原文為以正治國，以奇用兵，以無事取天下。至於「以奇用兵」嘅外語名Conte，就係著名意大利教頭干地。
另外就係「守正用奇」，名字出自《孫子兵法》，原文為以正合，以奇勝。外語名就係煲煙煲到出晒名嘅領隊Sarri(沙利)。
至於今期初出馬「自勝者強」，又係《道德經》名句。意思係贏其他人唔算最勁，能贏到自己先係真正強者，個名幾咁勵志呀。而外語名稱就係現任車仔德國籍教頭Tuchel(杜曹)。
仲有匹較特別就就係「魔連奴」，串咀教頭相信唔使多介紹。外語名乃前車仔前鋒迪亞高哥斯達。不過個串法有少少唔同，為Diego Kosta。雖然原來Costa變為Kosta，但大家都知佢講邊個。
講返呢匹「自勝者強」，父系出自「紅杉木」。而唔少在港同父馬，比如「時時有餘」、「東方雷」及「合夥芙蓉」，都曾於谷草贏馬或上名。所以「自勝者強」首次出場就揀窄場，並非全無根據。
唔好忘記，練馬師蔡約翰正為冠軍練馬師而努力，相信季尾階段會如常發炮爭取更多頭馬，反正倉口子彈眾多唔使需錫住用。騎師嘉里上星期三為蔡約翰騎2隻都贏晒，包括「華卓晴」同「當家信心」。所以呢對騎練今期合作嘅「自勝者強」都唔敢睇少，加上有1檔之利，隨時有驚喜。
