'

今年橡樹大賽有兩匹未輸過 上流貴婦最高分有著數

今年馬會首次越洋轉播英國橡樹大賽日,星期五由晚上9點起,7場比賽有得睇有得玩。除主題賽事英國橡樹大賽之外,仲有另一場G1加冕盃。提提大家,星期五晚賽事編號為S1,至於星期六英國葉森打吡賽日編號為S2。

查實哩半嘅英國橡樹大賽,歷史上都出過唔少好馬,近代例子就一定係「成全寶」。而上年「雪滿天」喺戴圖理跨下狂勝16個馬位,亦都令橡樹大賽嘅魅力大增。

講開戴圖理,佢生涯已經6度贏得英國橡樹大賽。除咗2017年「成全寶」以及2021「雪滿天」之外,2019年騎高仕登馬房「營養充足」都贏過是項錦標。至於今年戴圖理就如常同高仕登合作,所講就係奪標熱門「上流貴婦」。呢匹馬女出自父系「海都之星」,上年初出就跑場2歲馬1895米膠沙地新馬賽,結果順利勝出,當時騎師係郗福年。

之後高仕登就收埋佢唔跑,一直等佢慢慢成長。直到今年4月22日再上陣,換由戴理圖去沙丘園跑場1990米草地賽,當日「上流貴婦」雖然孭住133磅,但完全無影響發揮。入到直路推佢幾步就爆開對手成9個半馬位,姿態輕鬆得令人咋舌。

上個月出爭草地2051米G3慕絲多拉錦標,「上流貴婦」一樣咁精神,以5個幾馬位大勝。試準有長力之後,高仕登即替呢匹出3場贏晒嘅馬女報名參加橡樹大賽,相信對呢匹馬女信心十足。值得補充一點,今場國際評分最高就係110分嘅「上流貴婦」,跑平磅賽點都有著數。